Bola di Pak Tani

Mak Pono galak-galak manih sajo surang di palanta lapau Uwo Pulin. Nan lain lah samo bakaruik kaniang.

“Heran den jo Mak Pono. Urang lah mamakiak, nan inyo galak-galak manih se,” kato Udin Kuriak antaro tadanga jo indak.
“Kalau mamakiak awak kasadonyo, beko bagaduru pulo warga ka mari. Disangkonyo ado kabakaran atau kamalangan. Bunyi gandang tu batingkah makonyo lamak didanga Din!” baitu komentar Mak Pono.
“Tapi.....!”

“Indak ado tapi-tapinyo doh. Iko realita kaidupan. Antaro galak jo manangih kadang indak nampak batehnyo. Urang dapek hadiah juo bisa manangih,” kecek Mak Pono baliak.
“Tapi takana di den, apo Mamak indak marasoan suliknyo iduik kini? Harago lado lah malampaui bateh rasional, baitu juo harago-harago kapparaluan iduik lain. Malah, minyak tanah suliknyo Allahurabbi,” sambuang Udin.

“Satiok awak pasti marasokan suliknyo ekonomi kini. Saluruh awak di lapau ko pasti marasoan harago lado maha. Tapi Alhamdulillah, wak den dapek kiriman lado dari kamanakan. Untuak duo atau tigo hari ka muko rasonyo masih aman,” baitu jawek Mak Pono.

“Oooo...., patuiklah manih galak Mamak. Indak bapikia lai untuak mambali lado,” tadanga pulo suaro Angah Piyan.
“Itu kan kabatulan sajo. Kabatulan kapatang kamanakan datang. Namonyo sajo dari kampuang tantu mambao apo nan bisa dibao. Kabatulan pulo kamanakan tu baladang lado jo bawang, mako dibaolah sagalo saketek. Kawan-kawan nan indak ado lado, buliah datang ka rumah beko, diagiah agak duo buah surang,” jawek Mak Pono sambia galak.“Duo buah untuak apo tu Mak? Pamakan tahu?” solang Tacin Barain.

“Eh, beko dikatoan pulo den indak babaso. Dikatoan den makan surang se. Wak den sipak di balakang ko nan indak nio,” baleh Mak Pono.
“Yo, baruntuanglah pak tani. Kini dapek jo harago lado maha. Mudah-mudahan harago tu iyo lai maha dari ladang,” kato Tan Baro pulo.

“Di pak tani bola kini mah yo Tan!” Sorak Kari Garejoh.
“Iyo! Ambo sacaro pribadi satuju sakali-sakali bola dikuasoi dek patani. Salamo ko nan manguasoi pitih kan urang-urang bamodal dan urang-urang kayo se,” jawek Tan Baro.
“Tapi den kuatir, harago di pak tani jauah labiah murah daripado di pasa. Bisa sajo tangkulak bamain, dibali lado ka patani limopuluah ribu sakilo, tapi dijua tujuah puluah ribu. Dek pak tani nampak harago lado sampai limopuluah ribu, lah ijau se incek matonyo dan kasudahannyo nan balabo tu tangkulak,” Kari mulai maanalisa.
“Bisa juo bantuak itu. Harago maha tu hanyo pamainan agen sajo,” potong Angah.

“Ambo raso indak ka sampai bantuak itu bana doh. Patani awak kini lah cadiak-cadiak. Lah banyak patani di nagari awak ko maabihan wakatu di warnet sambia manunggu panen. Malah, indak saketek pulo nan bisa maakses internet dari hapenyo surang-surang. Jadi, indak masonyo lai awak marandahan patani,” kecek Tan Baro baliak.
Baitulah ota di lapau Uwo pagi kapatang. Karano matoari lah batambah tinggi juo, urang-urang tu mulai kalua untuak pai ka tampek karajo.